لندن (سعید نیازی) برمنگھم میں کنگز ہیتھ کے علاقے میں بدھ کی شب نماز پڑھ کر گھر جانے والے73سالہ بزرگ کو حملہ کرکے زخمی کرنے کے الزام میں پولیس نے دو نوجوانوں کو گرفتار کرلیا، جن کی عمر16,16برس بتائی گئی ہیں۔ یارک روڈ پر رات گیارہ بجے پیش آنے ولے اس واقعہ میں بزرگ کا ہاتھ ٹوٹ گیا تھا اور چہرے پر بھی زخم آئے تھے۔ میڈیا رپورٹ کے مطابق بزرگ کو پیچھے سے لات رسید کی گئی تھی۔ پولیس نے اس سے قبل ایجباسٹن اور ایلنگ میں دو مسلمان بزرگوں کو آگ لگانے کے واقعات سے اس واقعہ کے تعلق کو مسترد کیا تھا۔ مقامی بزنس مین جنید حسین کا میڈیا سے گفتگو کرتے ہوئے کہنا تھا کہ ایسے واقعات کا ہمارے گھر کی دہلیز پر پیش آنا خوفزدہ کردیتا ہے۔ انہوں نے کہا کہ رمضان کے سبب لوگ رات میں تاخیر سے مسجد سے فارغ ہوکر اکیلے گھر جاتے ہیں، اب بزرگوں کو اکیلے مسجد سے آنے کے لیے دوبار سوچنا ہوگا۔ دوسری طرف کنگز ہیتھ مسجد کے رضاکاروں نے رات تاخیر سے گھر واپس جانے والوں کی حفاظت کے لیے قریبی سڑکوں پر گشت کرنا بھی شروع کردیا ہے۔
