بالی ووڈ سپرسٹار سلمان خان کی شادی بھی ایک ایسا موضوع ہے جس پر دہائیوں سے بات ہو رہی ہے اور ان سے لگ بھگ ہر انٹرویو میں سوال پوچھا جا رہا ہے کہ ’بھائی شادی کب کریں گے؟‘ حالیہ دنوں سلمان خان کے 90ءکی دہائی میں دیئے گئے ایک انٹرویو کا ویڈیو کلپ سوشل میڈیا پر وائرل ہوا جس میں وہ اداکارہ جوہی چاولہ کے ساتھ شادی کی خواہش کا اظہار کر رہے ہوتے ہیں۔ اس کلپ پر اب جوہی چاولہ کا مؤقف بھی سامنے آ گیا ہے۔
انڈیا ٹائمز کے مطابق اس ویڈیو میں خاتون میزبان سلمان خان سے جوہی چاولہ کے بارے میں پوچھتی ہے، جس پر سلمان خان کہتے ہیں کہ ”جوہی چاولہ بہت ’سویٹ‘ اور قابل تعریف لڑکی ہے۔ میں نے ا
کے باپ سے کہا تھا کہ وہ میری اور اس کی شادی کر دیں لیکن انہوں نے انکار کر دیا تھا۔“ میزبان کی طرف سے جوہی چاولہ کے والد کی انکار کی وجہ پوچھنے پرسلمان خان بتاتے ہیں کہ ”پتا نہیں، شاید میں اس کے لیے فٹ نہیں ہوں، پتا نہیں کیا چاہیے ان کو۔“جوہی چاولہ سے ایک حالیہ انٹرویو میں جب سلمان خان کے اس ویڈیو کلپ کے بارے میں پوچھا گیا تو وہ ہنسنے لگیں۔
ہنستے ہوئے جوہی چاولہ نے کہا کہ ”جب میں نے انڈسٹری میں کیریئر شروع کیا تھا تو سلمان خان اس وقت سلمان خان نہیں بنے تھے۔ اتفاق سے مجھے ایک فلم آفر ہوئی جس میں مرکزی کردار وہ کر رہے تھے۔ میں کسی وجہ سے وہ فلم نہ کر سکی، جس کا وہ مجھے آج تک طعنہ دیتے آ رہے ہیں۔ وہ مجھے یہ بات یاد دلانے کا کوئی موقع ہاتھ سے نہیں جانے دیتے کہ میں نے ان کے ساتھ فلم کرنے سے انکار کیا تھا۔ واضح رہے کہ جوہی چاولہ نے 1995ءمیں جے مہتا نامی ایک کاروباری شخص کے ساتھ شادی کر لی تھی، جس سے ان کی ایک بیٹی جھانوی مہتا اور ایک بیٹا ارجن مہتا ہیں۔
