یوٹیلٹی اسٹورز، پاسکو اورنیشنل فرٹیلائزرسمیت متعدد سرکاری ادارے ملکی ضروریات کے لیے اجناس درآمد کرانے والے قومی ادارے ٹریڈنگ کارپوریشن آف پاکستان کے دو سوسینتالیس ارب روپے سے زائد کے نادہندہ نکلے،ٹی سی پی نے واجبات کی ریکوری کے لیے پارلیمنٹ سے مدد مانگ لی۔
دستاویز کے مطابق سرکاری اداروں نےگندم، چینی اور کھاد تو درآمد کر لی لیکن پندرہ سال میں بقایا جات نہ ادا کیے، جس پرٹی سی پی نے واجبات کی ریکوری کے لیے پارلیمنٹ سے مدد مانگ لی ہے۔
دستاویز کے مطابق یوٹیلٹی اسٹورز، پاسکو اور نیشنل فرٹیلائزر سمیت بعض ادارے ٹی سی پی کے 247 ارب 50 کروڑ روپے کے نا دہندہ ہیں۔ یہ واجبات پندرہ سال یعنی 2008 سے 2022 کے دوران سود سمیت زیرالتواہیں۔
دستاویز کے مطابق وزارت صنعت و پیداوار کا ذیلی ادارہ یوٹیلٹی اسٹورز کارپوریشن 74 ارب روپے کا نادہندہ ہے۔ یوٹیلٹی اسٹورز 9 سال سے چینی کی مد میں 70 ارب جبکہ گندم کی مد میں 16 سال سے 3 ارب 36 کروڑ ادا کرنے ہیں۔
نیشنل فرٹیلائزرمارکیٹنگ لمیٹڈ کے ذمہ درآمدی کھاد کی مد میں 99 ارب روپے سے زیادہ کے واجبات ہیں۔اسی طرح پاکستان ایگریکلچر سٹوریج اینڈ سروسز کارپوریشن یعنی پاسکو کے ذمہ بھی 45 ارب 80 کروڑ کے بقایاجات ہیں۔
